ໂອກາດດຽວກັນ, ສະພາແຫ່ງຊາດ ກໍ່ໄດ້ແຕ່ງຕັ້ງ ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ຂຶ້ນເປັນນາຍົກລັດຖະມົນຕີ ແຫ່ງ ສປປ ລາວ (ຄົນໃໝ່).
ແຕ່ງຕັ້ງ ທ່ານ ສອນໄຊ ສີພັນດອນ ເປັນນາຍົກລັດຖະມົນຕີ ແຫ່ງ ສປປ ລາວ ຄົນໃໝ່ ສ່ວນ ທ່ານ ຄຳພັນ ວິພາວັນ ພັກການຮັບອຸດໜູນບຳນານ
ກອງປະຊຸມສະໄໝສາມັນເທື່ອທີ 4 ສະພາແຫ່ງຊາດ ຊຸດທີ IX ອັດລົງດ້ວຍຜົນສຳເລັດຢ່າງຈົບງາມ, ໃນວັນທີ 30 ທັນວາ 2022 ທີ່ຫໍປະຊຸມສະພາແຫ່ງຊາດ, ເຊິ່ງໄດ້ປະກາດແຕ່ງຕັ້ງ ທ່ານ ສອນໄຊ ສີພັນດອນ ເປັນນາຍົກລັດຖະມົນຕີ ແຫ່ງ ສປປ ລາວ ຄົນໃໝ່, ສ່ວນທ່ານ ຄຳພັນ ວິພາພັນ ອະດິດນາຍົກລັດຖະມົນຕີ ພັກການຮັບອຸດໜູນບຳນານ.
ໃນວາລະພິເສດກອງປະຊຸມສະໄໝສາມັນເທື່ອທີ 4 ສະພາແຫ່ງຊາດ ຊຸດທີ IX, ໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ມີທ່ານ ທອງລຸນ ສີສຸລິດ ປະທານປະເທດ ພ້ອມດ້ວຍການນຳພັກ-ລັດຂັ້ນສູງ ແລະ ສະມາຊິກສະພາແຫ່ງຊາດໃນຂອບເຂດເຂົ້າຮ່ວມ,
ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ຕາງໜ້າໃຫ້ຄະນະປະຈຳສະພາແຫ່ງຊາດ ໄດ້ຂຶ້ນອ່ານໜັງສືສະເໜີຂອງປະທານປະເທດ ກ່ຽວກັບການພິຈາລະນາ ໃບຄຳຮ້ອງຂໍພັກການຮັບອຸດໜູນບໍານານຂອງນາຍົກລັດຖະມົນຕີ ໂດຍອີງຕາມລັດຖະທຳມະນູນແຫ່ງ ສປປ ລາວ ສະບັບເລກທີ 63/ສປຊ ລົງວັນທີ 8 ທັນວາ 2015,
ອີງຕາມກົດໝາຍວ່າດ້ວຍສະພາແຫ່ງຊາດເລກ ທີ 04/ສພຊ ລັງວັນທີ 9 ທັນວາ 2015 ແລະ ອີງຕາມກົດໝາຍວ່າດ້ວຍການປັບປຸງບາງມາດຕາຂອງກົດໝາຍວ່າດ້ວຍສະພາແຫ່ງຊາດ ແລະ ກົດໝາຍວ່າດ້ວຍສະພາປະຊາຊົນຂັ້ນແຂວງ ສະບັບເລກທີ 82/ສພຊ ລົງວັນທີ 30 ມິຖຸນາ 2020 ອີງຕາມກົດໝາຍວ່າດ້ວຍພະນັກງານລັດຖະກອນ
ມາດຕາ 64 ຂໍ້ 6 ອີງຕາມໃບຄຳຮ້ອງຂໍພັກການຮັບອຸດໜູນບຳນານຂອງທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ ນາຍົກລັດຖະມົນຕີ
ສະບັບເລກທີ 16 ທັນວາ 2022 ອີງຕາງການຕົກລົງເຫັນດີໃນກອງປະຊຸມກົມການເມືອງສູນກາງພັກ ແລະ ຄະນະເລຂາທິການສູນກາງພັກ ຄັ້ງທີ 21 ທັນວາ 2022 ໃນນາມປະທານ ປະເທດແຫ່ງ ສປປ ລາວ ຈຶ່ງສະເໜີມາຍັງ ທ່ານປະທານຄະນະປະຈຳສະພາແຫ່ງຊາດ ພິຈາລະນາໃຫ້ທ່ານ ພັນຄຳ ວິພາວັນ ເຂົ້າພັກການຮັບການອຸດໜູນບຳນານ ຕາມຄໍາຮ້ອງຂໍຜູ້ກ່ຽວ
ພ້ອມນັ້ນຍັງໄດ້ສະເໜີມາດຖານເງື່ອນໄຂຂອງຜູ້ທີ່ຈະດຳລົງຕຳແໜ່ງ ເປັນນາຍົກລັດຖະມົນຕີຄົນໃໝ່ ເຊິ່ງເຫັນວ່າ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ທີ່ມີເງື່ອນໄຂ ແລະ ມາດຖານຄົບຖ້ວນຕາມການສະເໜີຂອງປະທານປະເທດ.
ພາຍຫຼັງທີ່ຮັບຟັງການອ່ານໜັງສືສະເໜີຂອງປະທານປະເທດສຳເລັດ ສະມາຊິກສະພາແຫ່ງຊາດກໍ ໄດ້ປະກອບຄໍາເຫັນ ແລະ ລົງຄະແນນສຽງຮັບຮອງເອົາທ່ານ ສອນໄຊ ສີພັນດອນ ເເປັນາຍົກລັດຖະມົນຕີຄົນໃໝ່ ດ້ວຍຄະແນນສຽງເຫັນດີເປັນສ່ວນຫຼາຍ.
ໂອກາດນີ້ທ່ານ ສອນໄຊ ສີພັນດອນ ໄດ້ຂຶ້ນມີຄຳເຫັນກ່າວຮັບໜ້າທີ່ ເຊິ່ງໄດ້ໃຫ້ຄຳໝັ້ນສັນຍາວ່າ ຈະປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງພາຍໃຕ້ລັດຖະທຳມະນູນ ແລະ ກົດໝາຍຂອງ ສປປ ລາວ.
